• Black Facebook Icon
  • Black YouTube Icon
  • Black Instagram Icon
  • Black Pinterest Icon
  • Twitter

الإفصاح عن عمليات التجميل..

بعد فترة طويلة من مراقبة الساحة النسائية.. قرر خالد الزواج من بنت كويتية لكن بمواصفات خاصة. يسأل خالد والدته: يمه.. هل يحق لي أسأل خطيبتي عن عدد عمليات التجميل اللي أجرتها على نفسها..؟


تجاوب الأم (باستغراب): يعني من صجك بروح أقول حق البنت كتبي لي قائمة بعدد ونوع عمليات التجميل اللي قمتي فيها..؟


يضحك خالد ويقول: بصراحة الوضع اللي صاير مو طبيعي.. آنا مثلا أعشق جمال البنت الطبيعي.. ما أحب براطم (عتاب) ولا الشفايف الروسية.. وأكره شكل الشفايف المنفوخه.. والله يا يمه والله تذكرني في "الهوت دوغ" مع البصل في أكشاك لندن ههههههه شنو آنا بتزوج ولا بتريق..؟ بعدين آنا ما أحب مظلات السيارات اللي هابين فيها فوق العيون.. أبي رموش طبيعية.. وحتى الحواجب اللي تلمع.. ولا حواجب التاتووووه، تنرفزني.. رافعين حواجبهم فوووق كأنها "بوحقب" ياي من بعيد..


مع ملاحظة اني ما حبيت الخدود اللي مرتفعه كأنها صيهد بالبر.. شنو آنا بتزوج ولا بحط مخيم ربيعي..؟ ومن الامور اللي جدا تزعجني تعديل أطراف "الحنج".. بصراحه شيء مزعج جدا.. وترى يا يمه آنا كلش ما تعجبني "هيفاء وهبي" وكثير من البنات صاروا يشابهونها او يعملون خشومهم نفسها.. لا لا أنا ابي اذا تزوجت بنت تولد لي طفل يشابهني ويشابهها..


ما أبي اتفاجأ زوجتي تشبه هيفاء وهبي وفجأة عيالي يشابهون وتني هيوستن.. مع أن وتني هيوستن مملوحه بس بصراحه مو ذوقي.. وآنا من الناس أحب العيون السود وما يعجبني كللللش بنت سمره وحاطه عدسات لونها أزرق.. شكوووووو..؟؟؟


وأيضا مهم جدا أعرف البنت مسويه عملية تكميم ولا لأ..؟ لأن من حقي اعرف "عود" وجينات عيالي متين ولا ضعيف..؟ خاصة وإنه طالع خبر بأن عمليات التكميم فيها اعراض جانبية ومشاكل صحية ونفسية.. وأعتقد بعد كل هذا هناك سؤال يطرح نفسه: هل يحق لي السؤال عن عدد عمليات التجميل اللي مسويتها خطيبتي أم لا..؟ إنتهى.. 


بقلم/ عدنان الشرهان

JOIN Zafaf MAILING LIST

Tala Center, Salmiya, Kuwait
ABOUT US
SERVICES
JOIN US
STORE
CONTACT US

© 2020 by Nine peas publishing  Zafaf Kuwait, Salmiya Salem Al-Mubarak Street, Tilal Complex